قالوا لنا زمان في الأمثال والحواديت إن البحر غدار .. وكلنا عارفين إنه غدار .. ولا يوجد شخص دخل البحر ولم يشعر بخطورته وغدرته المفاجأة.. وسنجد الكثير من العلامات التي تؤكد أن الأمان للبحر درب من دروب الخيال.
وعشان نتكلم بشكل علمي ومفيد .. تعالوا نستعرض مع بعض أكتر الأخطار اللي ممكن تقابلك جوة البحر .. وازاي تتعامل معاها بهدوء عشان تخرج من البحر سالم غانم..
أول غدرة للبحر هي .. هي التيار المفاجئ:
فجأة هتلاقي الموج وانت جوة البحر بدأ يعلى والتيار بيسحبك لجوة البحر ومش عارف تخرج لبرة كل ما تحاول تخرج التيار بيسحبك .. وهنا المتخصصين بينصحوك إنك متحاولش تقاوم الموجة .. بالعكس هاودها لحد ما تعدي وابدأ عوم بزاوية ناحية الشاطئ .. يعني متعومش بطريقة مستقيمة أو straight خليك متجه ناحية الشط بزاوية ولو عرفت تشاور لحد من بتوع الإنقاذ أوعى تتردد.
تاني غدرة للبحر هي الثغرة:
فجأة وانت بتعوم بتلاقي نفسك اتنقلت من المية الضحلة للمية العميقة .. بمعنى أصح مش هتلاقي أرض تقف عليها وتسقط جوة قاع أكبر من طولك بكتير .. سقوطك جوة المية العميقة ممكن يسبب لك كسر في العمود الفقري أو إصابات في الحبل الشوكي .. يعني الموضوع مفهوش هزار .. طيب هتعمل إيه لو حسيت إن البحر نقلك من مية ضحلة لمية عميقة؟ هتجدف برجلك ضد المكان اللي إنت فيه وترفع جسمك لفوق وتحاول تطفو على قد ما تقدر وتحاول تعوم ناحية الشط مستخدم التجديف برجلك ضد التيار .. مع تأكيد إنك لازم تستعين بالمنقذ لو عرفت.
تالت غدرة للبحر .. هي النوة:
ودي المفروض بنكون على علم مسبق بيها .. يعني المفروض مننزلش البحر وفي توقع إن النوة ممكن تحصل .. ولكن لو حصلت فجأة لازم تخرج من البحر فوراً بدون تفكير.
رابع غدرة للبحر .. هي القنديل:
طبعاً في بعض الشواطئ ممكن نلاقي قناديل البحر .. وهنا لو حصل واتلسعت لا قدر الله لازم تخرج فوراً وتتوجه للإسعاف الموجود على الشاطئ عشان هما بيعرفوا يتعاملوا مع لسعات القناديل بشكل طبي سليم .. ومتحاولش تشطف لسعة القنديل بالمية عشان ممكن يحصلك تسمم في الدم.
خامس غدرة للبحر .. الاصطدام بالطحالب:
للأسف في البحر طحالب سامة ممكن تتسبب في حالات مرضية خطيرة .. وعشان كده لو صادفت طحالب وحصل جرح لا قدر الله اخرج للشط فوراً وتوجه لأقرب مستشفى أو أي مكان فيه رعاية طبية.
سادس غدرة للبحر .. قلبة المية:
يعني وانت بتعوم في أمان الله تلاقي البحر مخرج قمامة ومياه سودة للشط .. بيقولوا عليها عندنا في مصر البحر بينضف نفسه .. المية الملوثة دي خطر جدا على الجهاز الهضمي والمعدة ولازم نخرج من البحر فوراً لو البحر قرر ينضف نفسه وانت جواه ...
سابع غدرة للبحر .. هجوم الأسماك المتوحشة:
احنا هنا مش هنقولك لو هاجمك قرش هتتعامل معاه ازاي .. احنا بنخاف لو كيس بلاستيك اتلف على رجلينا واحنا في المية .. لكن خلينا نقول إن الشواطئ المحتمل ظهور أسماك القرش فيها مطلوب مننا إننا نكون دايما قريبين من الشط منبعدش لأكتر من 50 متر .. بلاش نلبس مايوهات ملونة وألوانها زاهية ..ونمنع نزول البحر من قبل المغرب بشوية لحد الصبح .. وكمان لازم نعوم في مجموعات بحيث لو حصل خطر لا قدر الله منكنش لوحدنا ونقدر نتصرف مع بعض ونلحق الخطر.